കല്‍പ്പറ്റ: വയനാട് ചെറുവിമാനത്താവളം കല്‍പ്പറ്റയില്‍ വരാനിടയില്ല. സാങ്കേതിക പരിശോധനയില്‍ വായുസഞ്ചാര പാത അനുകൂലമല്ലന്നാണ് റിപ്പോര്‍ട്ട് .പകരം മാനന്തവാടി കൊയിലേരിയില്‍ ഏവിയേഷൻ ഉദ്യോഗസ്ഥരുടെ പ്രാഥമിക പരിശോധനയില്‍ സ്വകാര്യ ഭൂമിയില്‍ വായുസഞ്ചാര പാത അനുയോജ്യമാണന്ന് കണ്ടെത്തിയതായാണ് റിപ്പോര്‍ട്ട്.
കല്‍പ്പറ്റക്കടുത്ത് മൂന്നിടത്ത് ഭൂമി കണ്ടെത്തുകയും അവിടങ്ങളില്‍ പല ഘട്ടങ്ങളിലായി പരിശോധനകള്‍ നടക്കുകയും ചെയ്തിരുന്നു. ഇതിൻ്റെ ഭാഗമായി ഏവിയേഷൻ വകുപ്പിലെ സാങ്കേതിക വിദഗ്ധരുടെ സംഘം നടത്തിയ പരിശോധനയിലാണ് ഏറ്റവും ഉചിതമെന്ന് പറയപ്പെടുന്ന കല്‍പ്പറ്റ ബൈപ്പാസിലെ എല്‍സ്റ്റണ്‍ എസ്റ്റേറ്റ് ഭൂമിയില്‍ വായുസഞ്ചാര പാതയുടെ സിഗ്നല്‍ ലഭിക്കുന്നില്ലന്ന് കണ്ടെത്തിയത്. എന്നാല്‍ റവന്യൂ വകുപ്പ് പദ്ധതിക്കെതിരായ റിപ്പോര്‍ട്ട് നല്‍കിയെന്ന ആക്ഷേപവും ഉയര്‍ന്നിരുന്നു.ഇത് ശരിയല്ലന്നും വിമാനത്താവളം വയനാട്ടില്‍ എവിടെയായാലും ഏറ്റവും അനുയോജ്യമായ സ്ഥലത്ത് വരണമെന്നാണ് റവന്യൂ വകുപ്പിൻ്റെ നിലപാടെന്ന് ജില്ലാ ഭരണകൂടം വ്യക്തമാക്കുന്നു.വയനാട് ചേംബര്‍ ഓഫ് കൊമേഴ്സിൻ്റെ നേതൃത്വത്തിലാണ് ചെറുവിമാനത്താവളത്തിനുള്ള ആദ്യ ഘട്ട ശ്രമങ്ങള്‍ നടന്നത്.
ഇതിനിടെ മാനന്തവാടിയില്‍ വിമാനത്താവളത്തിനുള്ള പ്രാഥമിക പരിശോധന തുടങ്ങി. കൊയിലേരിയില്‍ നിന്ന് ഒരു കിലോമീറ്റര്‍ അടുത്തായി പുതിയിടം ജ്യോതി പ്രസാദ് ,സഹോദരൻ ബാബു മറ്റ് ബന്ധുക്കള്‍ എന്നിവരുടെ പേരിലുള്ള 50 ഏക്കര്‍ ഭൂമിയിലുണ് ഏവിയേഷൻ വകുപ്പിൻ്റെ പ്രാഥമിക പഠനം നടന്നത്.
ഇവിടെ വായു സഞ്ചാര പാതയുടെ സിഗ്നല്‍ അനുകൂലമായതിനാല്‍ അടുത്ത ഘട്ടത്തില്‍ മണ്ണിൻ്റെ ഘടന സംബന്ധിച്ച പരിശോധനക്കായി ഒരു മാസത്തിനുള്ളില്‍ വിദഗ്ധ സംഘം എത്തുമെന്നാണ് സൂചന. ചതുപ്പ് നിലങ്ങള്‍ ഇല്ലാത്തതും, വീടുകള്‍, വലിയ കെട്ടിടങ്ങള്‍, മറ്റ് നിര്‍മ്മാണങ്ങള്‍ എന്നിവ ഇല്ലാത്തതും പ്രാരംഭ നിര്‍മ്മാണച്ചെലവ് താരതമ്യേന കുറഞ്ഞതുമായ സ്ഥലമാണ് കൊയിലേരി പുതിയിടത്ത് നിര്‍ദ്ദേശിക്കപ്പെട്ടിട്ടുള്ളത്. വയനാട് മെഡിക്കല്‍ കോളേജ് പോലെ പ്രാദേശിക വാദങ്ങള്‍ ഉണ്ടാവാതിരുന്നാല്‍ വയനാട് ചെറുവിമാനത്താവള സ്വപ്നത്തിന് വീണ്ടും ചിറക് മുളക്കാനിടയുണ്ട്.
ഒരു അഭിപ്രായം പോസ്റ്റ് ചെയ്യൂ